बुंगल नगरपालिकामा कुखुरा बोकेको जीप दुर्घटना।

बझाङको बुंगल नगरपालिका–४ पल्लो पिपल बजारमा आज बेलुकी ७ बजे कुखुरा बोकेको जिप दुर्घटनामा परेको छ । महेन्द्रनगरबाट बिजगडा आइरहेको से १ च १५०३ नम्बरको बोलेरो जिप उकालो चढ्न नसकी एक्कासी ब्याक भई सडकबाट करिब ६ मिटर तल खसेर दुर्घटना हुँदा २३० कुखुराको मृत्यु भएको छ ।।कञ्चनपुरको पुनर्वास नगरपालिका–११ डोकेबजारका ३० वर्षीय चालक शंकर तामाङले चलाएको उक्त बोलेरो जिपमा मानवीय क्षति भने नभएको अस्थायी प्रहरी पोष्ट बिजगडाका प्रहरी सहायक निरीक्षक कृष्णराज भट्टले जनकारी दिनुभएको छ । जिपमा रहेका ४७० कुखुरामध्ये २३० कुखुराको घटनास्थलमै मृत्यु भएको छ भने बाँकी कुखुराहरूको अवस्था सामान्य रहेको बताइएको छ । घटनाको जानकारी पाएलगत्तै अस्थायी प्रहरी पोष्ट बिजगडाबाट प्रहरी सहायक निरीक्षक कृष्णराज भट्टको नेतृत्वमा तीन जनाको टोली घटनास्थलमा पुगेको थियो । उहाँका अनुसार दुर्घटनाको थप अनुसन्धान भइरहेको छ।