६ सय ४९ स्थानीय तहमा अस्थायी कोभिड अस्पताल बनाइने

समितिको निर्णयबमोजिम मन्त्रालयले स्थानीय तहलाई पत्राचार गर्दै कोभिड– १९ अस्थायी अस्पताल सञ्चालनसम्बन्धी मार्गदर्शन, २०७७ बमोजिम खर्च गरी प्रगति प्रतिवेदन पठाउन पत्रचार गरेको छ । अस्थायी अस्पताल निर्माणका लागि बजेट प्राप्त गर्नेमा काठमाडौं उपत्यकाकै १४ वटा नगरपालिका र तीन गाउँपालिका पनि छन् । मन्त्रालयले ती अस्पताल व्यवस्थापनमा प्रतिबेड दुई लाखका दरले खर्च गर्ने गरी सम्बन्धित स्थानीय तहलाई दश–दश लाख रुपैयाँ कोष तथा लेखा नियन्त्रण कार्यालयमार्फत निकासा भइसकेको जनाएको छ ।

मार्गदर्शनअनुसार स्थानीय तहमा रहेका आधारभूत स्वास्थ्य सेवा केन्द्र, स्वास्थ्य चौकी, प्राथमिक स्वास्थ्य केन्द्रका भवन, सामुदायिक भवन वा अस्थायी टहरा निर्माण गरेरसमेत तत्काल कोभिड– १९ को बिरामीको उपचारको व्यवस्थापन गर्नुपर्नेछ । निकासा भएको १० लाख रुपैयाँमध्ये स्थानीय तहले तीन महिनाका लागि पाँच बेडमा पाँच लाख र औषधिका लागि ५० हजार रुपैयाँ खर्च गर्न पाउनेछन् । त्यस्तै, एक चिकित्सक, दुई नर्स र एक कार्यालय सहयोगीका लागि पारिश्रमिकबापत चार लाख ५० हजार रुपैयाँ खर्च गर्न सक्नेछन् । यसबाहेक आवश्यक पर्ने रकम र व्यवस्थापन खर्च स्थानीय तहले आफ्नो कोषबाट खर्च गर्न मन्त्रालयले आग्रह गरेको छ । कार्य प्रगतिका आधारमा तीन महिनापछि थप बजेटसमेत पठाउने मन्त्रालयले आश्वासन दिएको छ । – नयाँ पत्रिका