बैतडी ; सुदूरपश्चिममा सभामुख चयनका लागि २८ गते निर्वाचन हुने भएको छ। यसअघि माघ २ गते निर्वाचन हुने भनिएकोमा त्यस दिन उपसभामुखको निर्वाचन हुने र २८ गते सभामुखको निर्वाचन हुने बताइएको छ।
सोमबार बसेको प्रदेशसभाको पहिलो अधिवेशनको पहिलो बैठकबाट ज्येष्ठ प्रदेशसभा सदस्य मानबहादुर रावलले पुस २८ गते दिउँसो १ बजे बस्ने बैठकमा सभामुखको निर्वाचन गर्ने गरी सूचना प्रकाशित गर्न निर्देशनसमेत दिएका छन्। उनले त्यसका लागि आवश्यक तयारी गर्न प्रदेशसभा सचिवालयका सचिव देवबहादुर बोगटीलाई जानकारी समेत गराए।
नेपालको संविधान धारा १८१ को उपधारा १ र प्रदेशसभा नियमावली २०७४ को नियम ७ बमोजिम सभामुखको निर्वाचनका लागि पुस २८ गते दिउँसो १ बजेका लागि समय निर्धारण गरिएको हो।यस्तै प्रदेशसभाको पहिलो बैठकले प्रदेशसभा सञ्चालन गर्न निर्माण गरेको प्रदेशसभा नियमावली २०७४ र पहिलो संशोधन २०७६ लाई सर्वसम्मतले स्वीकृत गरेको छ।
प्रदेशसभाको अर्को बैठक पुस २८ गते दिउँसो १ बजे बस्नेछ।
